معاك لبشره طبيعيه وتحدي

ازيكم يا بناتى الاحباء
انا حبيت اكلمكم النهارده في موضوع جميل مش واخدين بالنا منه ان كل واحده مننا حلمها توصل ببشرتها لقمه النعومه والبياض واللمعان بس اللي ملاحظاه ان ده من سن 18 الي ما شاء الله
عارفين ليه
نتكلم طبي بقي وبالعقل
اولا :اوعي واحده منكم تنكر تاثير المواد الكيميائيه علي وشها
وكمان عمايل الوش اللي بتلهبه - بنحط ميك اب - مبهورين بالكريمات وطالعين حاطين داخلين حاطين
ما افتكرش وانا في اعدادي ان واحده صاحبتي قالتلي انا بشرتي دهنيه ولا انا قولت ان بشرتي جافه
اذا فلابد من فحمله علشان نرجع بشرتنا للطفوله ونقولها يا فاتنتي
نوع البشره مهما اختلف اساسه واحد خلايا ومسام ولكل بشره موادها اللي تستخدم ليها
زي البيوت فيه شقه فيه بيت صغير فيه فيلا كله من اربع جدران بس مش فرش واحد
وهي دي البشره و في كلامنا مش هيبقي نقل وتقليد كلامنا هنا يا اما عن شئ مجرب او من وجه نظر طبيه
حملتنا تنص ع الاتي
* البعد عن المسببات لدمار البشره
* العنايه والاهتمام بالبشره
*الصح والخطا في فن التعامل مع البشره
* كيفيه العنايه بالجسم
ويا ريت نمشي علي قول الرسول (صلي الله عليه وسلم )" قليل دائم خير من كثير متقطع "
يعني اهتمي ببشرتك كل يوم بحاجه بسيطه مش متعبه ولا تعملي حمام بخار بس كل شهر فهمتي اقصد ايه

كل عضوات المنتدي نوعين نوع بشرته كويسه الحمد لله بس عايز اهتمام ورعايه دائمه ربنا يثبتهم
ونوع بشرته مدمره وعايز يعالج الاول وبعد كده يمشي علي النظام
النوع ده بقولهم ارجوكم ارجوكم ركزوا معايا دي اهم خطوه في العلاج لمده عشر ايام هي دي المده اللي محتاجاها ممنوع وضع ميكب او حتي كونسلر او كحل واكيد الماسكرا من الميكب
ممنوع وضع كريم تفتيح من اي نوع طول العشر ايام

نسمي ونبدا - بسم الله الرحمن الرحيم
*اولا زي ما قولنا مسببات الدمار

قولنا هنبعد عن الميك اب - مش محتاجين وجه نظر علميه فيها دي
هتقولولي والحكل ليه لاء هقولكم وقف الميك اب ككل هيوقف استخدام غسول الوجه ومناديل ازاله الميك اب وكمان الكونسلر والكحل و المسكره عده اسباب لظهور الهلات السوداء بالاخص الكونسلر

طب وهنبعد عن كريمات التفتيح ليه - لان كل كريمات التفتيح كلهاااااااااا تسبب جفاف البشره
فيه كريم نهار وده فرق كبير بينه وبين كريم التفتيح
معني كريم نهاري يعني مرطب نسبه الزيوت فيه ضئيله بمعامل حمايه من الشمس يبدا من 15 وفيه نسبه تفتيح البشره لا تقوم علي تكسير الميلانين ولكن بتجديد الخلايا علي البشره السطحيه وتكوين خلايا جديده من لون البشره الام وده من اامن الكريمات اللي ممكن تحطيها الصبح

طبعا ممنوع وضع زيوت نهارا - لان الزيوت في ضوء السمش بتتاكسد وبعد ما تتاكسد ها ايه تتزرنخ اه اسمها كده
هههههههههههههه اطمنوا لازم تقعدوا تلات شهور في الشمس علشان تتزرنخ
لكن هي هتتاكسد والكسده دي بتضر البشره جدا وبتدي تاثير عكسي

اكيد ممنوع ع الصبح كده تجيبي قطعه تلج وتمرريها علي وشك وتقولي وااااااااااااااااااااااو انتعاش الصباح
دمرتيها مش كده -اي شئ مثلج ممكن فتوكه تقولي طب مكعب ميه ورد هقولها لااااااااااااااااااء بردو هيضر البشره -السبب العلمي
البشره عند الاستقياظ تكون في حاله من السبات وارتخاء لعضلات الوجه فالشد المفاجئ لعضله مترخيه ثم شطفها بالميه العاديه يعني فجاه بردو بنرجعها لطبيعتها مع التكرار يرهل المنطقه
الكلام جامد باختصار يساعد علي ظهور التجاعيد هه من الاخر

ع الصبح غسول وتونر طب بالله عليكم ليه انت نايمه فين ما يا في الشارع يا سريرك فيه حاجه مش طبيعيه
هي صابونه طبيه للبشره الدهنيه ويستحسن سموث فيس
والبشره الجافه انتو اخركو ميه ع الصبح ولا حرام ممكن صبونه خفيفه نابولسي شاهين العسل دي او اختها نيفيا بالجلسرين ممكن دوف ممكن سموث فيس بردو انا بشره جافه وعشره تلات سنين عادي يعني

تنشيف الوش بالفوطه اكيد بس ضربات مش حك يعني ده مش جسمك ده وش ووش حساس لانه متبهدل دلوقتي فضربات خفيفه كده

ياربي احنا لسه عند الحوض انا تعبت

طب نزلنا الحمد لله انا بقول الممنوع دلوقتي بس
-البشره اللي بتعاني من اي شئ في اي شئ
ياريت ما تستخدمش المناديل المعطره بحجه ان بشرتها عليها تراب وعايزه تنضفها -السبب العلمي : كلها فيها نسبه كحول واحنا عايزين نوقف اي كيماويات غير علاجيه حاليا
عايزه تستخدمي يبقي ايزي كير بيبي خاليه من الكحول او مناديل جونسون ودي بقي تحفه مناديل بالكاموميل وزيت اللوز يعني تمسحي بيها وشك وانت مغمضه
حتي مناديل ازاله الميك اب المكتوب عليها خاليه من الكحول لا تستخدميها - لان كلها فيها نسبه حكول ده شئ لا جدال فيه لازم لازاله المواد الدهنيه في الميك اب ان يكون المذيب يحتوي علي مركب يكسر الدهون وهو اي كحول ايثيري ولسه ما اخترعوش مناديل ازاله ميك اب بالعصاره الصفراويه

المنوعات دي طبعا بفكر اهو الناس للي بشرتهم تعبت من الميك اب وعايزين يبطلوه ويرجعوا بشرتهم

رجعنا البيت يالا بسرعه نغسل وشنا
ممنوع الغسول الكيميائي لمده عشر ايام وكذالك التونر وده للبشره الدهنيه والجافه وكله
طب هنعمل ايه ؟
عادي اغسلي وشك (البشره الدهنيه ) بصابون ديتول او لايف بوي او بروتكس ممنوع طبعا اي صابونه طبيه لحب الشباب مثلا كابريتاج
واغسلي وشك (البشره الجافه ) بصابون جلسرين او سموث / كلير فيس ممنوع الديتول او لايف بوي او بروتكس
طب غسلنا التونر اكيد طبعا التونر ده مهم وما نقدرش نستغني عنه علشان ده اللي هنقعد بيه لبليل من غير ما نلمس بشرتنا تاني طب نعمل ايه

معلش بقطنه وحطي زيت زيتون علي وشك لمده خمس دقايق او تالت دقايق وامسحيها بقطنه بردو هتعرفي انك كنت بتلعبي في الطينه مش غاسله وشك
وبعد كده زجاجه ميه ورد وحطيها في التلاجه وحطي منها بقطنه وبس ما تغسليش وشك

بالليل لو بتستخدمي كولاجين وقفيه طول لفتره دي - الكولاجين مع بشره حساسه ممكن يسبب التهابات وانتفاخ في الوجه

طب حاجه مهمه اوي ونركز بقي ده احنا هنام
البشره الدهنيه مشكلتها ايه لما بتتبهدل مشكلتها الحبوب اكيد طب ممنوع وضع اي مرطب حامي علي البشره نهائي اثناء النوم يعني جلسرين زيت الوز المر زيت جنين القمح الفازلين كل ده ممنوع
طب الحل هقوله في البرنامج اليومي
البشره الجافه مشكلتها ايه الجفاف اكيد من اسمها يعني انا بتكلم علي الجافه بس مش الحساسه
ممنوع اي كريم تفتيح ليلي
ميه الورد ليلا - ميه الورد بس لما نرجع من بره ومره واحده في اليوم كترها هيهلك البشره الجافه
طب الحل بردو هنقوله في البرنامج اليومي
البشره الحساسه مشكلتها ايه الحمار والالتهاب والتشققات
ممنوع اي مرطب حامي اثناء فتره العلاج كجنين القمح وزيت اللوز
الجلسرين والفازلين غير ممنوع
ممنوع ميه الورد
ممنوع كريم التفتيح الليلي
طب الحل هقوله بعد شويه
البشره المختلطه (يعني الخدود مقشره والانف دهنيه برؤس سوده )
ممنوعين من اللي اتمنعوا منه البشره الدهنيه والحساسه
ما تعيطوش هقولكم الحل

الكل ممنوع من الشيكولاته اثناء فتره العلاج او الشطه او السجاير (بديهي ما بنشربش ) او الكحول(ما تفهمونيش غلط اللي ف الغسول والمناديل المزيله للميك اب)
يستحسن عدم التعرض في الشمس فالطالبات تصبر لاجازه علشان النتيجه تبقي تمام
والموظفات لو شغلك الصبح قبل عشره يبقي كويس وهنتكلم علي مشكله الشمس واحنا راجعين
الفتوكات اللي قاعده في البيت ما اسمعش نفس
وبكده نكون خلصنا اشهر الممنوعات
وندخل علي التقيل وهو البرنامج اليومي لمده عشر ايام ووعد ان شاء الله بشره تقوليلها يا فاتنتىىىىىىىىى

المره دي بجد مش هزعل لو مرديتوش
الموضوع ده طلب شخصي وعملته موضوع علشان الفايده تعم الجميع واحتسبه عند الله

رجعالكم